انتوا عارفين ان فصل الشتاء من اكتر الأوقات اللي الكل بيخاف وزنه يزيد فيه.
فصل الشتاء الجسم فيه بيحتاج طاقة علشان يحقق التدفئة، فبينتهي اليوم واحنا واكلين 7 وجبات!
احنا بقا نستغله بشوية ذكاء و 4 حاجات نعملهم
1- الرياضة:
الرياضة بتساعدنا نفضل محافظين على نشاطنا طول اليوم ونعلي معدل الحرق. بدل ما نحول الأكل لدهون نساعد الجسم على حرق الدهون، ونرفع من درجة حرارة الجسم ونقلل الإحساس بالبرد.
2- النوم:
لا لا، مش اي نوم وخلاص! نثبت مواعيد نومنا عشان نوصل للنوم العميق اللي فيه الجسم بيبدأ يجدد خلاياه واستعادة نشاطه، ونحافظ على ساعات نوم منتظمة.
3- شرب الماء:
كل الناس بتنسى شرب الماء في فصل الشتاء بسبب اننا مش بنحس بالحرارة والعطش زي الصيف والربيع، لكن بنكون في اشد الحاجة ليها لعدم جفاف اجسامنا. وكمان الشتاء الرطوبة فيه أقل اللي بيسبب جفاف البشرة، وشرب الماء بيساعد على المحافظة على مرونة البشرة وتقليل التشققات.
ممكن نزود معدل المياه في جسمنا بأننا نضيف في يومنا المشروبات الدافية ومن غير سكر طبعا، يعني تدفئة وترطيب!
4- الأكل:
من المهم اننا ناخد بالنا من نوعية الاكل وكميته. ولازم مع نوبات الجوع الشتوية اننا نحافظ على ان يكون الأكل صحي ولذيذ ونقسم وجباتنا على فترات عشان نمنع الجوع.
وممكن نزود البروتين النباتي زي العدس بأنواعه والحمص،وبذور الشيا وبذور الكتان
شاركوني رأيكم وتجاربكم الشتوية اللطيفة، وايه الأكل اللي بتعتبروه أكل الشتاء!